Servodatoasi ovdasátni

Guovdageainnu suohkan guoddá dovdomearkkas nanu vuođuin – ii gosge máilmmis leat sámegiella, sámi kultuvra ja sámi ealáhusat seamma nanu dásis go Guovdageainnu suohkanis. Muhto “ofelaš sámis” lea eambbo go dušše dovdomearka – dat lea maiddái min višuvdna.

Deaddil ja stuora govva ihtá

 

6 vuoruhanguovllu

Višuvnnaid mielde čuvvot vuordámušat ja geatnegasvuođat ollašuhttit iežamet áigumušaid. Suohkanplána servodatoassi, mii dás ovdanboahtá sierra servodatplána bokte, guoskkaha erenoamážiid 6 vuoruhanguovllu maidda suohkan áigu bidjat fuomášumi. Areálat ja biras, mánáidgárddit, skuvllat ja oahpahus, dearvvašvuohta ja čálgu, kultuvra ja astoáigi, ealáhusovdánahttin ja árvoháhkan – ja suohkana iežas organisašuvdna. Lassin vuoruhemiide mat bohtet ovdan servodatplánas leat muhtin oassemihtut ja doaibmabijut konkretiserejuvvon suohkanplána areálaosiin ja suohkanoasseplánas - Márkan. Dáid plánaid lassin lea suohkanstivra maiddái mearridan plánastrategiija bokte ráhkadit sierra suohkanoasseplána Mázii.

Ruđalaš ja olmmošlaš návccat

Vuođđun buot áigumušaid čađaheapmái lea čorgadis ja nanu ekonomiija. Ekonomiija mearrida man buriid čálgofálaldagaid suohkan sáhttá fállat, muhto maiddái makkár návccat gávdnojit bargat servodatovdánahttimiin veahkkálaga eará almmolaš eiseválddiiguin, ásahusaiguin, ealáhusaiguin, servviiguin ja muđui eaktodáhtolaš aktevrraiguin. Suohkanplána oasseplánain namuhuvvojit ollu áigumušat mat eaktudit sihke ruđalaš ja olmmošlaš návccaid – jus dáid áigumušaid galgá vejolaš čuovvulit de lea dehálaš doalahit čorgadis ja nanu suohkanekonomiija.

Suohkanplána lea dehálaš bargoreaidu

Suohkanplánii ja oasseplánaide lea mearriduvvon doaibmaáigodat 2017 – 2030, ja dán áiggis bohtet dát dokumeanttat eahpitkeahttá leamen suohkana deháleamos bargoreaiddut. Suohkanplána mii geavahuvvo árjjalaččat duddjo ávkin sihke suohkanii, almmolaš ja priváhta ásahusaide, fitnodagaide ja eaŋkilolbmuide. Mu áigumuš lea ahte suohkanplána oktan oasseplánaiguin geavahuvvo árgabeaivválaš bargoreaidun, ja ahte mii dárbbu mielde maiddái leat miellasat ođastit plána nu ahte dat álo vástidivččii servodaga duohtadillái ja dárbbuide.

Loahpadettiin háliidan giittit sihke ovddeš ja dálá suohkanstivrraid ja plánalávdegottiid barggu ovddas, suohkanhálddahusa ja Rambøll plána hábmenbargguin ja buohkaid geat leat ovddidan oainnuset álbmotčoahkkimiid, gulahallančoahkkimiid ja gulaskuddamiid bokte.

Johan Vasara, sátnejođiheaddji, Guovdageainnu suohkan

Gávdnet go dan maid ozat?
Johan Vasara
Sátnejođiheaddji/Ordfører
E-poasta
Mobiltelefovdna 930 99 520