Suohkan gearggus ođđa joaŧkkaskuvlii ja našunálateáhterii!

Statsbygg ovddidii njukčamánu 1. b. 2018 iežas konseaptaárvalusa ráđđehussii, mas evttohit movt ja gosa ođđa Sámi joaŧkkaskuvla- ja boazodoalloskuvla ja Sámi Našunálateáhter Beaivváš galget ceggejuvvot. Dan botta go vuordit ráđđehusa huksengohččuma, de lea Guovdageainnu suohkan ráhkkanahttime huksenbargguide. Suohkanstivra čuovvolii Statsbygga árvalusa, ja várri geassemánu 14. b. 300 000,- areálaplánabargui mas evttohuvvon huksenguovlu sihkkarasto ođđa teáhtera ja skuvlla várás.Deaddil ja stuora govva ihtá BEAIVVÁŠ SÁMI NAŠUNÁLATEÁHTER / JAPPE NIELSEN

Guovdageainnu suohkana mihttun lea leamen ofelaš sámis - sámi kulturoaivegávpot. Máŋgga dáfus dat lea diehttelas ášši midjiide, nugo okta dain moatti báikkiin máilmmis gos sámegiella ain lea beaivválaš ja ealli giella eanaš oktavuođain. Muhto nugo earáge báikkiin, de eaktuda kulturbargu vissis bargoreaidduid jus fiinna mihtuid galggašii leamen vejolaš ollášuhttit. Sámi Našunálateáhter Beaivváš ja Sámi joaŧkkaskuvla- ja boazodoalloskuvla leat guokte dehálaš ásahusa, mat doibmet dego bargoreaidun ovddideames sámi giela, kultuvrra ja servodateallima.

Deaddil ja stuora govva ihtá

Ovttajienalaš suohkanstivra

Statsbygga konseaptaárvalus, mii geigejuvvui ráđđehussii 1. b. njukčamánus dán jagi, lea ožžon doarjaga sihke joaŧkkaskuvllas, teáhteris, suohkanis ja Sámedikkis. Mis lea danin nanu jahkku ahte dál viimmat beassat ovtta lávkki viidáseappot, ja duohtandahkat huksenprošeavtta. Mun lean ilus go suohkanstivra geassemánu 14. b. ovttajienalaččat dagai mearrádusa mas sihkkaraste huksenguovllu Statsbygga huksenplánaid hárrái. Dát mearrádus lea dehálaš signála sihke teáhterii, skuvlii, Sámediggái ja Ráđđehussii ahte Guovdageainnu suohkan lea gearggus - go fal beare Ráđđehus gohčušii Statsbygga álggahit huksenprošeavtta. Min sávaldat lea ahte Ráđđehus čavčča bušeahttaárvalusastis 2019:ii ektui evttoha várret ruhtadeami visttii ovdaprošekteremii, nu ahte visot lea gárvvis álggahit huksenprošeavtta boahtte jagi.

Dás gávnnat eambbo geassemánu 14. b. suohkanstivraáššiid birra.

Johan Vasara
Sátnejođiheaddji/Ordfører
E-poasta
Mobiltelefovdna 930 99 520