Oahpahus ja doaimmat

Mánáidskuvlla jahkeplánat leat ráhkaduvvon Sámi oahppoplánaid mielde, ja leat báikkálaččat heivehuvvon earret eará fáttáid, doaimmaid ja oahppomátkkiid ektui.

Váhkkoplána/bargoplána sáddejuvvo ruoktot ohppiid mielde juohke vahku ja e-boastta mielde váhnemiidda. Skuvllas lea doaibmaplána masa skuvlla doaimmat leat čállon áigodagaide, earret eará našunála geahččalemiid čađaheapmi, ohppiidiskkadeapmi ja kártengeahččaleamit. Mánáidskuvllas lea doaibmaplána mas eanas doaimmain lea árbevirolaš máhtu sisdoallu.

Oktasaš doaimmat

Doaimmat leat oktasaš doaibmabeaivvit buot ohppiid váras, dahje doaimmat juhkkojuvvon iešguhtet jahkecehkiide.

Oktasaš doaimmat masa olles skuvla searvá:

  • oktasaš olgobeaivi čakčat (čakčamánu). Oahppit vulget muhtin báikái, jávregáttis dahje eatnogáttis. Doaimmat leat čadnon sámi árbevirolaš máhttui. Galget leat sihke ovdabarggut ja barggut maŋŋil, čadnon daidda doaimmaide. Doaimmat dán beaivvi leat fierbmun, suidnen, murjen, murren, láibun ja hillagáhkuid goikadit.
  • Vuođđoskuvlavahku doallat. Válljejuvvon fáttát. Skuvlajagi 2017/2018 lei/lea fáddá “Olmmáivuohta mobbeneastadeaddji doaimmaiguin”.
  • Fáddávahkku Sámi álbmotbeaivvi olis, fáddá 2016/17 lei 100 jagi ávvudeapmi Tråante.
  • Ohppiidkonsearttat heivvolaš oktavuođain, ovdamearkka dihte ovdal juovllaid ja Sámi álbmotbeaivvi oktavuođas.
  • Davvikalohttačuoigamat, 2. – 10. luohkkáhasaide. Jahkásaš dáhpáhus mii váldá guokte skuvlabeaivvi. Báikkálaš gilvu, ja falimusat dain gilvvuin besset loahppačuoigamiidda, mii lea ovttasbargu skuvllaiguin lagassuohkaniin Eanodat, Muoná, Gáresávvon ja Vazáš, Suoma ja Ruoŧa bealde.
  • Oktasaš čuoiganbeaivvit giđđat.

Doaimmat iešguhtet cehkiin

Mánáidskuvllas lea báikkálaš DKS-plána (Den kulturelle skolesekken) mas kultuvrralaš doaimmat ja vásáhusat iešguhtet kultuvra- ja dáiddaovdanbuktimiid siskkobealde, leat oassin. Doaimmat lea dávjá luohkkácehkiid mielde ja leat earret eará:

  • Fitnat oapmedálus
  • Vuodjit herggiiguin
  • Fitnat báktesárgumiid geahččame Álttás ja galledit VEFAS fitnodaga
  • Galledit Sámedikki Kárášjogas
  • Fitnat gárdde luhtte

Lanjat ja olgoguovlu

Mánáidskuvllas lea sierra 12,5 vuojadanbasseaŋga mii lea buori ortnegis ja adno mánáid- ja nuoraidskuvllas oahpahusdoaimmaide. Skuvllas lea maiddai lášmmohallanlatnja, ja atná maiddai suohkana faláštallanhálla, ja goappašagat adnojit lášmmohallamii ja konsearta- ja teáhterbáikin. Skuvllas lea maiddai garraduodjelatnja ja gievkkan oahpahussii, ja vel luonddufágalatnja.

Skuvllas lea stuora olgoguovlu, mas lea spáppastallanhiŋggal, unna spábbačiekčanšillju, stuora čierastallanluohkká, darfegoahti huksejuvvon jagi 2016, dollasajit, suonjir, giccohagaš, ja stuora olgošillju mii lea asfalterejuvvon.

Gávdnet go dan maid ozat?
Turid Vesterheim
Rektor Guovdageainnu mánáidskuvla/barneskole
E-poasta
Telefovdna 452 53 237