Ođđa servicevisti ja jánddurbisananbáiki guorbmebiillaide

Guovdageainnu suohkan čoahkkinasti duorastaga 13.9 Stáda Geaidnodoaimmahagain ulbmilin ásahit bistevaš jánddurbisananbáikki oktan servicevisttiin Guovdageainnu márkanbáikái. Stáda Geaidnodoaimmahat lea dál almmuhan gilvvu, ja huksejeddjiid áigemearri buktit fálaldaga Doffin/KGV bokte lea golggotmánu 22. beaivi 2018.

Døgnhvileplass 1 - Deaddil ja stuora govva ihtáDøgnhvileplass 1

Guovdageainnu suohkan lea várren suohkanplána areálaoasis báikki gosa ulbmilin lea láhčit infrastruktuvrra guorbmebiillaid várás (govva) - ja dan olis lei čoahkkin mannán vahkku gos Stáda Geaidnodoaimmahat bivddi beassat geahčadit suohkana várrejuvvon guovllu ja ovdanbidjat iežaset ásahanplánaid suohkanii.

RV93, otná E45, lea dat geaidnu mas eanemus trafihkka olles Finnmárkkus. Dušše luosaid eksporterema dáfus meattildit badjel 4000 guorbmebiilla Guovdageainnu juohke jagi, ja oktiibuot leat E 45 mielde beali eambbo guorbmebiillat go E6 bokte oarjjabeal Álttá. Geađgeluobbala duollostašuvdna lea Finnmárkku áidna riikkarasttildanbáiki gos stášuvdna lea rabas birrajándora, mii dieđusge mielddisbukta ollu trafihka Guovdageainnu bokte.

Kilde; Finnmark Fylkeskommune - Deaddil ja stuora govva ihtá

Mii leat buohkat guhkit áiggi badjel vásihan smávebuš ja muhtomin stuorebuš hástalusaid mat čuvvot das go guorbmebiillat čužžot "summal" iešguđet bisananbáikkiin márkanis. Almmolaš ásahusat, fitnodagat ja muđui ássit leat vásihan bárttiid, ja suohkana buollinčaskkadanveahka lea ovddidan duođalaš cealkámuša mas bivdet buoridit bisanan-infrastruktuvrra amaset guorbmebiillat caggat buollinčaskkadanbiillaid beassamis olggos stášuvnnas. Nuppebeales leat guorbmeealáhusa bealis ieža ohcalan albma bisananbáikki Guovdageainnus mii vástida vuddjiid vuodjin- ja vuoiŋŋastannjuolggádusaide ja gos maiddái iešguđetlágan fálaldagat nugo servicevisti, boradanbáiki ja muđui relevántta bálvalusat leat olámuttos. Dás lea sáhka báikkis mii galgá geassit 10 guorbmebiilla hávális, muhto suohkana geográfalaš sajáidagain Davvikalohta gávpogiid ektui de lea dá juoga mii sáhttá stuoriduvvot boahtteáiggis. Stáda vuodjin- ja vuoiŋŋastannjuolggádusat geatnegahttejit vuddjiid bisanit ja vuoiŋŋastit juohke 4,5 diimmu, ja dasalassin lea sáhka oččodit modul-vogntogaid (25.5 m guhku guorbmebiillaid) Suomas Norgii. Min mihttu lea ásahit bistevaš terminála Guovdageidnui man ealáhus sáhttá geavahit čanastarbáikin gaskkal oarje-, nuorta-, davve- ja lulleguovlluid. 

Mun lean danin ilus go beasan almmuhit ahte Stáda Geaidnodoaimmahat viimmat lea mearridan vuosttaš lávkki - ásahit jánddurbisananbálvalusa Guovdageidnui. Huksenprošeakta oktan doaibmakontrávttain almmuhuvvo geaidnodoaimmahaga beales dán čavčča (dábálaš fálaldatgilvvu hámis). Gilvu lea rabas buohkaide, muhto mun sávan dieđusge báikkálaš fitnodagaid lihkostuvvat fálaldatgilvvus sihke huksema ja bistevaš doaimmahanovddasvástádusa dáfus. Ođđa jánddurbisananbáikki oktavuođas ávžžuhan bealistan dál juo ovddidit beroštumi ásahit fitnodaga KBA1 nammásaš ealáhusguvlui (geahča artihkkala), mii ásahuvvo lulabeallái jánddurbisananbáikki.

Gávdnet go dan maid ozat?
Johan Vasara
Sátnejođiheaddji/Ordfører
E-poasta
Mobiltelefovdna 930 99 520
Sindre Murud
Suohkanjođiheaddji/Kommunalleder
E-poasta
Telefovdna 948 23 699

Teknihkkalaš ovttadat/Teknisk enhet