Gonagasa Ánsomedálja Inga J. Turi Hættai

Čakčamánu 3. beaivvi gulahii Norgga Gonagasviessu ahte Gonagasa Ánsomedálja geigejuvvo Inga J. Turi Hættai. Ánsomedálja evttoheaddjit leat Guovdageainnu girkosearvi ja sotnabeaiskuvla. Guovdageainnu suohkan sávvá Ingai ollu lihkku!


inga-turi-hatta - Deaddil ja stuora govva ihtá

(Sárdni dilalašvuođa oktavuođas)

Mun lean nugo Guovdageainnu sátnejođiheaddji ožžon dan gutni Gonagas Harald V ovddas buktit dearvvuođaid ja geiget Gonagasa ánsomedálja dutnje, Inga, ja lean ilus go mii ná máŋggas leat  ávvudeame du.

Gonagasa ánsomedálja vuođđuduvvui Gonogas Haakon VII bokte 110 jagi dás ovdal, guovvamánu 1. beaivvi 1908:is, ja geigejuvvo sidjiide geat leat doaimmahan servodatávkkálaš barggu juogo dáiddalaš, kultuvrralaš, dieđalaš, ealáhuslaš, sosiálalaš dahje humaniteara doaimmaid bokte. Medálja ovdabealis lea otná gonagasas portreahtta oktan su válgagielain “Alt for Norge”, ja duogábealli lea fas čiŋahuvvon kránssain man sisa ánssášeaddji namma lea čállojuvvon sisa. Medálja galgá guddojuvvot gurutbeale rattis, rukses bátti nalde mas fiskes sáhcu gasku.

Inga – don leat allaagat olmmoš gii leat doaimmahan eambbo go maid mun gearggašin namahallat dás. Mun háliidan aŋkke geassit ovdan muhtin oasi das maid don du doaimmaid bokte leat addán min servodahkii. 1950-80-logus, 30 jagi badjel, doaimmaheidde doai du isidiin sihke droššefálaldaga ja ambulánsafálaldaga min suohkanis. Seammás dáinna doaimmain, áiggis mii lei veahá eanet hástaleaddji go odne, ledje dus dehálaš doaimmat sihke suohkanis ja searvegodderáđis. Ee. sáhttit namuhit ahte don 1950-logus ledjet sin searvvis geat plánije ja ceggije Guovdageainnu otná girku, ahte čiŋáhit girku sihke liiđiguin ja rukses máttáiguin - seammás go suohkana ovddas ledjet sihke fásta lahttun Guovdageainnu bearaš- ja beaiveruovttus, várrelahttun sosiálastivrras, čielggusvuođalávdegottis ja kulturlávdegottis – ja ovdaolmmožin Guovdageainnu girkosearvvis.

Du árjjalaš doaibmama bokte girkolaš bargguin ja erenoamážiid mánáiguin ja nuoraiguin sotnabeaiskuvlla bokte lea nubbi stuora kapihttal, man birra ánsomedálja evttoheaddjit ja otná doaluid lágideaddjit, Guovdageainnu Girkosearvi ja sotnabeaiskuvla, ieža bohtet dás muitalit. Don leat máŋgalot jagi čađa eaktodáhtolaččat bargan earáid ovddas, ja stuora áŋgirvuođain addán min mánáide ja nuoraide vearditmeahttumis sisdoalu bajásšaddadettiin. Suohkana bealis háliidan giittit du visot du doaimmaid ovddas.

Dáiguin sániiguin geigen dutnje, Inga J. Turi Hætta, Gonagasa Ánsomedáljain. Ollu lihkku.

Johan Vasara

Sátnejođiheaddji, Guovdageainnu suohkan

Gávdnet go dan maid ozat?
Johan Vasara
Sátnejođiheaddji/Ordfører
E-poasta
Mobiltelefovdna 930 99 520
Servicetorg Bálvaleapmi
Telefovdna 78 48 71 00