Guovdageainnu suohkan bovde gulahallančoahkkimiidda boahttevaš eananhálddašeami birra Guovdageainnus.

gaskavahkku 17. golggotmánnu 2018, 18.00 - 20.00

Diehtojuohkin

lavvoriggi - Deaddil ja stuora govva ihtá Sátnejođiheaddji Johan Vasara boahtá čilget maid suohkan dál bargá Finnmárkokommišuvnna hárrái ja manne lea dehálaš gulahallat, ja ovttasráđiid soabalaččat bargat dan nammii ahte sihkkarastit báikkálaš hálddašeami min suohkanis. Čoahkkimiidda searvá maid láhkačeahppi Laila Susanne Vars gii sáhttá veahkkin sátnejođiheaddjái vástidit gažaldagaid.

Suohkan lea mearridan ovddidit oktasaš eananoamastangáibádusa buot suohkana eatnamiidda olles suohkana álbmoga namas. Vuođđun gáibádussii lea sápmelaččaid historjjálaš eananhálddašeapmi ja geavaheapmi.

Suohkanstivra galgá loahpalaččat mearrádusa dahkat áššis juovlamánus 2018 ja ovddidit min oktasaš gáibádusa kommišuvdnii. Suohkan háliida ahte Guovdageainnu álbmot galgá beassat boahtteáiggis hálddašit eatnamiid ja meahcceriggodagaid ja bivddu sámi árbevieruid ja riekteipmárdusaid vuođul.

Finnmárkokommišuvnna sámi vuoigatvuođakárten bargu rahpá dán vejolašvuođa nannet báikki olbmuid vuoigatvuođaid ja maid sirdit hálddašeami báikkálaš dássái. Min ulbmil lea nannet báikkálaš álbmoga vuoigatvuođaid, erenoamážit sihkkarastit sámi rivttiid, ja sámi meahcásteddjiid ja boazodoalu beroštumiid buorebut vuhtiiváldit. Suohkana bargu galgá leat doarjjan báikkálaš olbmuid vuoigatvuođaid nannemii, ja danne fertet mii ovttas geahččat movt lea buoremus ovddidit oktasaš oamastangáibádusa. Suohkana gáibádus ii galgga moktege hehttehussán dasa ahte ovttaskas olbmuid dahje joavkkuid vuoigatvuođat nannejuvvojit kommišuvnna bealis. Movt du mielas galggašii eananhálddašeapmi leat boahtteáiggis? Movt sáhtašeimmet soabalaččat hálddašit eatnamiid ja meahcceriggodagaid? Suohkan dárbbaša suohkana álbmoga, riekteguddiin, doarjaga dán áššis, go mii ovddidit searválaga dán gáibádusa. Kommišuvdna galgá maid meannudit boazosámisiiddaid rájiid, suohkan bovde siiddaid ovddasteddjiid sierra čoahkkimii juste dán birra.

Báiki

Máze giliviessu grendehus
 

Váldde oktavuoda

Guovdageainnu suohkan/Kautokeino kommune
 

Johan Vasara
Lasit dáhpáhusa iežat kaleandarii