Válga 2015

Dán jagi besset guovdageainnu suohkana 16- ja 17-jahkásaččat jienastit suohkanválgii, vaikko eai leat deavdán gávccenuppelot jagi. Guovdageainnu suohkan lea mielde vuoliduvvon jienastanagi geahččaleamis maiddai dán jagi, nu movt jagis 2011.

 

Hei.
Don gii gulat Guovdageainnu suohkanii ja leat riegádan jagiid 1998 ja 1999, beasat dál jienastit suohkanválgii vaikko it leat deavdán 18 jagi!

Guovdageainnu suohkan lea mielde geahččaleamis mas 16- ja 17-jahkásaččat besset jienastit suohkanválggas. Mii leimmet mielde seammá geahččaleamis jagi 2011.

Don sáhtát ovdagihtii jienastit dahje jienastit válgabeaivvi. Jus áiggut ovdagihtii jienastit, de sáhtát dan bargat juohke sajis máilmmis!

Jus leat Norggas, de gávnnat lagamus jienastanbáikki dán neahttasiiddu bokte: http://valglokaler.no/se/ .

Dá lea čilgehus movt jienastat eará báikkiin go Norggas:
https://www.regjeringen.no/no/portal/valg/slik-stemmer-du/stemme-i-utlandet/slik-forhandsstemmer-du-i-utlandet-pa-sv/id463238/ .

Ovdamunni jienastit Guovdageainnu suohkanis lea ahte de oaččut válgalisttuid mat gullet Guovdageidnui. De beasat maiddai rievdadit listtu jus dan háliidat.
https://www.regjeringen.no/no/portal/valg/kommunestyrevalg/endre-pa-stemmeseddelen/id458274/

Jus jienastat ovdamearkkadihte Álttás dahje Kárášjogas, de sis eai leat listtut mat gullet Guovdageidnui, muhto oaččut listtu mas čužžot bellodagaid/listtuid namat. Dus lea lohpi ieš váldit mielde dan listtu masa áiggut jienat addit. Go jienastat eará báikkis, de dat sáddejit du jiena Guovdageidnui. Dat mearkkaša ahte ii ábut vuordit maŋemus beaivái, de ii soaitte du jietna ollet min lusa áigemearrái mii lea mánnodat čakčamánu 14. beaivi diibmu 21.00.

Ovdagihtiijienasteapmi lea rabas árgabeivviid diibmu 09.00 – 15.00, ja báiki lea bálvaluskantuvra Guovdageainnu suohkanviesus. Dábálaš ovdagihtiijienasteapmi álgá borgemánu 10. beaivvi. Mázes sáhttá maiddai jienastit ovdagihtii 31.08 – 11.09.2015 diibmu 12.00 – 15.00.
http://valglokaler.no/se/kommune-forhands/guovdageaidnu-kautokeino/

Fuomáš ahte mis lea rabas márkanis guokte lávvordaga, 29.08. ja 05.09. diibmu 10.00 – 15.00.

Jus it hálit ovdagihtii jienastit, de fertet leat Guovdageainnus válgabeaivvi, mánnodaga čakčamánu 14. beaivvi. Dan beaivvi leat válgábáikkit rabas Báktehárjjis Guovdageainnus, Máze skuvllas ja Láhpoluoppal skuvllas.

Rabasáiggiid oainnát das: http://valglokaler.no/se/kommune/guovdageaidnu-kautokeino/

Deaddil dan báikki gos áiggošit jienastit, de oainnát rabasáiggi. Báktehárjjis sáhtát maiddai sotnabeaivvi 13.09.2015 jienastit, diibmu 15.00 – 21.00.

Dás čilge movt jienastat válgabeaivvi: https://www.regjeringen.no/no/portal/valg/kommunestyrevalg/stemme-pa-valgdagen/id457103/

Go vuolggát jienastit, de lea dehálaš ahte válddát mielde legitimašuvnna, mas oaidná nama, riegádandáhtona ja galgá vel leat govva.

Don gii leat vuollel 18 jagi ii beasa jienastit fylkediggeválgii, duššefal suohkanválgii. Jus lea jearaldagat válgga birra, fina min luhtte bálvaluskántuvrras, mii de muitalit ja neavvut movt jienastit.
Dál lea DUS vejolašvuohta váikkuhit Guovdageainnu boahtteáiggi!