PRD Luovosbeatnagat

Dihtet go ahte sáhtát lágalaččat váldit gitta luovosbeatnagiid?

 

Guovdageainnu álbmot vásiha stuora váttisvuođa go beatnateaiggádiin lea beanadoallu mii ii leat beatnatlága mielde. Lea beatnateaiggáda ovddasvástádus bearráigeahččat ahte beana dahje beatnatdoallu ii sakka muosehuhte olbmuid, birrasa dahje eará beroštumiid. Beatnateaiggát galgá maiddai bearráigeahččat ahte beatnatdoallu ii ráhkat dorvvohisvuođa earáid ovdii.

Juohkehaččas lea vejolašvuohta váldit gitta beatnaga mii lea luovos, beatnatlága mearrádusaid mielde. Beana galgá farggamusat dolvojuvvot politiijaid lusa dahje beatnatdoalli lusa jus dat lea báikkis. Politiijaide sáhttá dán oktavuođas riŋget, nummár 02800. Politiijat sáhttet vuovdit beatnaga, gávdnat dasa eará ruovttu dahje goddit dan lagat mearrádusaid vuođul. Lea buorre buohkaide, maiddai beatnateaiggádii, ahte luovos beana váldo gitta.

Ii leat suohkana ovddasvástádus váldit gitta luovos beatnagiid, muhto baicca oassi politiijaid ortnetbálvalusas, dadjá sátnejođiheaddji Klemet Erland Hætta.